Leseproben
Besuch aus Las Vegas - Ein Stück in Pfälzer Mundart
Personen:
• Monsieur Rudolfo alias Rudi Lämmlein
• Miss Dolly Partridge
• Der Bürgermeister
• Der Bauer (Friedrich)
• Der Wirt (Guschd)
• Die Wirtin (Marie)
• Die Wirtstocher Zilli-Zens (Eva)
• Die Revisorin
Erster Akt
Wirt und Wirtin in der Gaststube. Später Vormittag. Beide sind mit Aufräumen beschäftigt. Bühnenbild: Zwei Tische, mehrere Stühle, darauf Gläser, Aschenbecher. Ein Tresen, darüber Bier-Werbung, ein Schrank mit Schnapsflaschen, ein Glücksspielautomat. Ein Fenster mit offener, ein Fenster mit zugezogener Gardine (dahinter der Bahnhofsschalter für den zweiten Akt).
WIRTIN: Des glaab isch net, dass der kummt!
WIRT: Unn warum net?
WIRTIN: Was will donn so äner in Freischbach?
WIRT: A - kondidiere!
WIRTIN: Ja, konn der donn redde?
WIRT: A, wonn der singe konn, werd der aa redde kenne.
WIRTIN: Schunn. Isch mään doch: Redd der Deitsch?
WIRT: Redd donn de Borschemäschder Deitsch?
WIRTIN: Do hoscht aa widder rescht - mer wääß jo alleweil nimmi, was die iwwerhaupt schwätzen!
WIRT: Do druff kummt's jo aa net oo. Awwer mer brauchen äner, wu uff unsere Seit iss!
WIRTIN: Unn vunn eisch Monnsleit iss käner uff eiere Seit?
WIRT: (winkt ab) Schunn! Awwer der muß doch aa gewinne kenne!
WIRTIN: Unn so äner konn gewinne? Den kennt doch bei uns kää Mensch!
WIRT: Freilisch konn der gewinne! Des iss de "Schdarfaktor".
WIRTIN: De Schdarfaktor? Was iss'n des?
WIRT: Des loßt sisch mathemadisch reschne, awwer dodefu verschdehschd du nix!
WIRTIN: Donn saach mer's uverschdändlisch, dass isch's verschdeh.
WIRT: Des iss des Verdraue in ä Persönlischkeit des öffentlische Lewens, was entschdeht, weil äner bekonnt iss, obwohl en käner kennt!
WIRTIN: (ungläubig) Ah, so! Isch verschdeh!
WIRT: Nemm emol oo, de Robert Redford ded bei uns kondidiere. Glaabschd net, dass den jeder wähle ded?
WIRTIN: De Robert Redford? Fer de Freischbacher Borschemäschder?
WIRT: Nur emol zum Beischbiel.
WIRTIN: Ja, hoschd den aa gfroocht?
WIRT: (zögert) Der hot grad kää Zeit!
WIRTIN: Awwer de Monsieur Rudolfo vunn Las Vegas, der hot Zeit?
WIRT: Der nimmt se sisch!
WIRTIN: Awwer wieso donn?
WIRT: Weil isch so moi Kontakte hab!
WIRTIN: (skeptisch) Ach, was du disch drauscht! Ääfach so do oozurufe, in Las Vegas. Des iss doch weit!
WIRT: Schunn. Awwer so ä kläni Partei wie unsri konn än Prominente als Unnerschditzung gut gebrauche.
WIRTIN: Isch denk, des geht um unsern Acker, vunn dem du willschd, dass der emol Bauplatz werd?
WIRT: Des aa. Awwer halt bloß die Gosch!
WIRTIN: Unn do kummt de Monsieur Rudolfo extra vunn Las Vegas wesche unserm Acker?
WIRT: Dess iss bloß ää Option. Der kummt noch wesche gonz onnere Interesse. Awwer jetzt vergeß des widder, Fraa. Om beschde, du hättscht des gar net ghert. Geh liewer unn verdähl die CDs on doi Freundinne. Unn saach, die sollen fleißisch 's Mitsinge iwe - än Schdar werd schließlisch erschd gebore dursch soi Publikum.
WIRTIN: Was häßt gebore? Isch denk, der isses schun?
WIRT: Hajo issers schunn! In Las Vegas! Ää gonz großi Nummer! Awwer halt in Freischbach noch net! Du wägschd doch, wie des so iss: die Mihle mahlen langsam.
WIRTIN: Ah, isch verschdeh! Des iss wie mit dem Brad Pitt: Der iss in Amerika gebore, awwer es hot ball dreißisch Johr gedauert, bis den aa in Deitschlond jeder gekennt hot.
...
"Besuch aus Las Vegas" gibt es als E-Book bei Amazon. Link zu Preisinfo und Bestell-Seite:
Rechtlicher Hinweis
Sämtliche veröffentlichten Texte sind urheberrechtlich geschützt. Ein Nachdruck, auch auszugsweise, ist nur mit ausdrücklicher, schriftlicher Genehmigung der Autorin gestattet!